【情人節博宣傳】吳奇隆、劉詩詩浪漫行沙灘
楊冪微博唔見劉愷威
建立時間: 0214 15:37
http://hk.apple.nextmedia.com/enews/realtime/20140214/52187018
今日就係19年一遇嘅中西情人節，好多藝人都會喺微博，明示或暗示咁曬下幸福，祝大家情人節快樂咁。先係同賭王千金何超蓮拍拖嘅吳克羣，佢喺微博就話：「情人節到了……你如果不能好好愛，那就把它當元宵節過就算了！如果找不到人好好愛……只好3月7號進電影院看脫軌時代！學一下怎麼愛。」唔係同超蓮示愛，而係宣傳部電影《如果不能好好愛》，仲一日宣傳兩次，事關佢過咗一陣又話：「小心啊！情人節，緣消節……別過錯哦！」其實會唔會太過hard sell呢？
而新婚嘅大肚婆楊冪就冇晒佢同劉愷威嘅幸福相，反而係貼咗一張自拍，仲好簡單咁話：「情人節湯圓節快樂～就這樣吧，好好兒過哈。」真係好簡單，感覺仲有啲hea 0添，過咗一陣，佢又好似吳克羣咁，宣傳下電影，但佢宣傳嗰一套就唔係好應節，事關佢宣傳套戲名叫《分手大師》，喺情人節講呢啲會唔會有啲唔係好啱呢？不過戲名係咁，又唔代表係成套戲都講分手嘅，但相信就唔會有情侶會今日去睇呢套戲囉。
至於同師兄劉浩龍熱戀中嘅容祖兒，佢就連自拍都冇張，佢先貼咗一張有兩個卡通梨嘅圖話：「Happy valentine's day！」而圖入面寫住：「We make a nice pear.」係唔係暗示同師兄一齊好幸福呢？過咗一陣，佢又貼咗一張煎餃子嘅圖，仲話：「我也希望學識包這個，delicious !!!! 」唔通係想學識之後包畀師兄食？
有個幸福家庭嘅黃貫中，就比較簡單，佢話：「雙料情人節，願各位得到及給予雙份的愛，元宵情人節快樂 ！媽媽，老婆，女兒 及所有看到的人。」但過咗一陣，佢就顧及咗單身嘅朋友話：「如果你是還沒有或打算有情人的，今天也對你說聲：雙節棍快樂 ！」真係好貼心。
而田亮今日就去咗分享佢嘅愛，有報道就話佢同老婆今日去咗北京嘅民政局，為今日註冊結婚嘅朋友送花同朱古力，真係一個好好嘅祝福啊。而內地劇情《步步驚情》今日就貼咗啲情人節海報出嚟，仲要以吳奇隆同劉詩詩為主，喺海報見到佢哋兩個好浪漫咁行沙灘，仲好sweet咁坐喺遊艇上面，真係同情人節好夾。
